الخميس، فبراير 04، 2010

خبر عاجل ...جدا

الاعضاء المحترمين..مساء الخير وارجو متكونوش نمتو منى والانعاش ياخد فترة..طبعا المفروض انى كنت اكمل الحلقة الاخيرة من مقدمة الموسوعة ولكن تصادف ان عضوة فاضلة سألتنى سؤال ..وبصراحة جدا استغربت جدا لانه وصل الضحك على الناس الدرجة دى...الخبر بيقول ان فى منتج لمنع انبات الشعر يقضى تماما على الشعرة ويحتوى على حمض النمليك...آه النمليك من النمل يعنى وطبعا نظرا لان منتجه هوة علامة القطرين فريد ايامه البروفسور شين اللتات...فطبعا الحريم بتجرى وتبرطع حتى لو هيبيعو فيها الراجل...ونظرا لانى لا اؤمن بالاسماء حتى لو كانت بتصدعنا ليل نهار على الفضائيات ..النكته الجديدة بتقول ان البيه عامل تركيبة للقضاء على نمو الشعرنهائيا تحتوى على حمض النمليك ..وده طبعا بييجى من ادغال افريقيا الوسطى حيث يتم جمع النمل وهرسه وتصفيته وارساله للبرفسور اللى هيعمل الكريم ...وعجبى..ونظرا لظروف الناس البروفسور منزله بخمسميت جنيه...بس...يا طيبة قلبك ياراجل..مش هرغى كتير لانى لسانى زالف حبتين فى موضوع الاستغلال ده ...باختصار شديد :
١-حمض النمليك هو حمض الفورميك بس طبعا البروف لازم يعمل انه جاب النملة من شنبها
٢-حمض الفورميك مادة كاوية حتى بتركيز واحد من عشرة فى المية
٣-حمض النمليك اساسا يستخدم كمبيد لافات النبات وافات المناحل لقتل الكائنات المتطفله على النحل
٤-حمض الفورميك يمتص داخليا وقد يسبب التهابات فى عدد من الاعضاء اهمها الكلى
5-الغريب انه ممنوع اساسا حتى انه نفاياته تترك تنزل للبالوعات طبعا لانه امن زى منتو عارفين ...
6-يحفظ فى اوعية مغلقة محكمة ولو حاجة اتفتحت تخرج لمكان جيد التهوية
7-ده لنك حمض النمليك بتركيز واحد من عشرة فى المية ...وربنا يستر على جلد البشر...وعقولها...ويقينا شر النصب
http://www51.honeywell.com/sm/rlss/bandj/common/documents/Formic_Acid_in_Water_452.pdf

الاثنين، فبراير 01، 2010

الأعشاب و الشعر (الجزء الثانى)

هنا نتكلم عن الجانب التانى ..وهو الاعشاب المقاومة لسقوط الشعر و التى تعمل على تقويه البصيلة و تحفيز نموها و انبات الشعر الضعيف ...عن طريق مقاومة الكود الجينى ...و الجانب ده خلو بالكم مهم جدا ...لانه بيتعامل مع سقوط الشعر الوراثى فى الانثى و الصلع فى الرجل ...طبعا جين سقوط الشعر جين مرتبط بالجنس يعنى فى رجل اصلع بس مفيش امراه صلعاء ..بيسموها متساقطة الشعر ...وده من حكمة ربنا ان جين الصلع محمول على الكرموسوم الذكرى (Y)ولما كانت الانثى لا تحمل هذا الكرموسوم ده فلا يمكن ان تكون صلعاء ..بس متساقطة الشعر ...الكود الجينى ده كود يحمله الجين يعمل على سقوط الشعر برفع مواد معينه فى الجسم او بتحفيز هرمون معين او بتقليل هرمون آخر ...فصدك يعنى ممكن الصلع الوراثى يتعالج ...مقدرشى اقول اه ..بس اقول انه يمكن الحد منه و مقاومته ..بالذات فى النساء ..
## العشبة الاولى هى الحلبه ...طبعا هتستغربو ..ويمكن بعضكم قرا عن كدة بس مكانش متخيل انها حقيقة علمية او ليها اساس علمى ..هوة بصراحة طريقع عملها مش واضحة حتى الان ..بس لقو انها فعلا بتقاوم هجوم الجين الشرس على البصيله ..و فى كل طب الدنيا بيستخدموها لهذاالغرض (بالاضافة الى اغراض اخرى فى منتهى الاهمية لربما تناولناها فيما بعد) ..الطب الفرعونى و الطب الهندى و الطب الصينى حتى الطب العربى ....و الطب الغربى برضو بدا و الم تكن معتمدة بعد ..ككثير من العلاجات العشبية الفعالة ...احد النظريات بتقول انها بتقلل تكوين الكولستيرول اللى ارتفاعه بسبب اى خلل جينى يقود الى موت البصيله وده طبعا لمحتواها من ماده فعاله جدا و رائعه اسمها (الديوسجينين)ودى بيسموها فى اوروبا كلها ((البروجستسرون الطبيعى))وعلى فكرة العالم الامريكى بيفخر انه عنده نبته اسمها ((اليام)) YAM وفخورين قوى بمحتواها من الديوسجينين و احنا نستورد مركبات اليام ((بيسموها البطاطا الحلوة )) و فى كتابه الرائع ((جرين فارماسى)) للدكتور جيمس ديوك صرح انه بالتحليل تبين ان محتوى الحلبه الشرق اوسطية اعلى من محتوى اليام بتاعهم فى هذه المادة ..سبحانك يا رب ..وهنا ملاحظة غريبه فعلا ...كل الاعشاب اللى بتخفض الكولسترول ..بتمنع تساقط الشعر ....بس الحلبه لها تاثير رائع فى المجال ده ...الجميل انها بتعمل توازن هرمونى فى الجسم و اللى يسبب خلله ايضا سقوط الشعر برضو بسبب الديوسجينين دى ..ويمكن ده سبب استخدامها الشائع فى تظبيط الدورة و نزولها لما تتاخر ...محتواها العالى من الاحماض الامينية المفيده للشعر زى الليسين و التيروسين وغيرهما المهمة فى تكوين الشعرة مساعد اخر فى مقاومة الجين ..فيها كم نوع من الفيتامين كلها مفيدة للشعر و الفروة .( ريبوفلافين و بانتوثينيك اسيد بيروديكسن والفوليك) كل ده مزايا جبارة فيها ...الجميل انها بتحتوى على تركيز عالى من السيلينيوم ودى زى منتو عارفين مادة مضادة للاكسدة و كل مضادات التاكسد بتقى من سقوط الشعر ..عاوز اختصر و اقول ان احدث ابتكارات شركات الاعشاب الاوروبيه كبسولات الاساس فيها خلاصة الحلبه المجففه...مع بعض الفيتامينات الاخرى و اللى اثبت التجارب انها بتجيب تاثير كويس جدا على المدى الطويل ...عارف انكم زهقتو بس عاوز اقول حاجة اخيرة ..ان من الاعشاب اللى بتقوى تاثيرها فى المجال ده الجسنج السيبيرى و ده فى عده ابحاث
##طيب اتناولها ازاى ...طبعا خلاصة مجففة فى كبسولات اساسى ....خلاصة سائله دهان للشعر يوميا...شامبو بخلاصة الحلبه لو ممكن ..وكنت مرة طلب منى صديق شامبو يمنع سقوط الشعر ..فعملتله شامبو بخلاصة الحلبه و عرق السوس ..لمدة شهر ...و الله يا جماعة بعد اسبوع كان بيالف شعر فى الشامبو ...مش بس لانه منع السقوك بشكل ملحوظ ..كمان لانه منعم للشعر و دى حقيقة فعلا ...وزمان كانو بيغسلو رؤسهم بماء الحلبه علشان التنعيم ...بس ده مش وقته ...
##اساسى قبل متاخدى اى عشب تعرفى ممارس الاعشاب اللى بيتابعك ايه بتاخدى من ادويه لان الحلبه من الاعشاب القويه اللى بتتفاعل مع ادويه معينه
     

السبت، يناير 30، 2010

(الاعشاب و الشعر (الجزء الأول)


 من خبرتى و تجاربى تبين ان علشان اتخلص من سقوط الشعر و ضعف نموة و خفته و ضعفه ...فى سبع جوانب لازم نتكلم عليها ...كل جانب يلزمه نوعيه من الأعشاب بتجيب نتايج كويسه واحيانا كويسه جدا فيه ...باذن الله كل مرة نتكلم على جانب من الجوانب علشان الملل و الزهأ ...واتمنى  تجربو  بنفسكم مع التاكد من نوعيه الاعشاب لان للاسف الشديد احد اهم اسباب فشل نتايج الاعشاب هى غشها لانك بتستعملى اعشاب مش هيه اللى مكتوبة وموصوفه ..كم من حاله اطلب منها شراء اعشاب تجيب لى حاجات تانيه خالص لان العطارين للاسف معندهمشى اى علم مجرد بيع و بس ..و المتخصصين مبيبيعوش اعشاب ..الا قليل منهم ...معلش تقلت عليكم ..نتكلم عن الجانب الاول ...واصبرو معايا شويه :
##(الجانب الأول)...وهوة الجانب الهرمونى فى الموضوع ...فمعظم المتخصصين و خبراء الاعشاب و الاغذية فى العالم بيعزو مسالة تساقط الشعر و الصلع (غير الجينى) الى تحول هرمون التيستستيرون فى الجسم الى حاجة اسمها داى هيدروتستيستيرون ...المشكله ان هذا التحول وهذه المادة بتروح لبصيله الشعر تدمرها وتقودها زى مبيقولو الى التقاعد المبكر ...تقول اخت ناصحة طيب منحاول نمنع هذه التحول ونريح نفسنا ....اقولها برافو عليكى ...تسال اخت ناصحة تانيه طيب هوة فى اعشاب لكدة ....اقولها طبعا ..وكل منجى مركبات منع التساقط بتعتمد عليها ...نقول الاعشاب وهقولكم ازاى تستخدموها بس عاوزكم متملوش وتنامو منى ...
1- عشبة البلميت المنشارى ودى من طايفه النخيل زى نخل الزينه كده ودى صورتها
دى بتنتج حاجة زى البلح كدة شوفتوها فى الصورة ...دى فيها الجزء الفعال ...خلاصة الثمرة دى ..دى من اقوى الاعشاب فى وقف التحول اللى احنا قلناه ...ونفس الفكرة دى و بنفس الطريقه بتشتغل فى التهاب البروستاتا (موضوع كبير تانى) ..طيب ازاى استخدمها ..شوفى يا ستى ممكن تاخدى جرعة يوميا من الخلاصة فى صورة نقط او كبسولات او اقراص للخلاصة المجففه ..انا نفسى كنت عامل منها لوشن للشعر وكان بيجيب نتايج كويسه جدا بالذات مع اعشاب تانية ...ممكن برضو تبقى فى صورة شامبو بخلاصة مركزة و يستحسن انها تتاخد داخليا ..يعنى شرب و خارجيا يعنى دهان باى صورة ...بس تكون خلاصة مركزة ...(هنبقى ان شاء الله نعمل ورشة عمل نشوف ازاى تحولى منتجات الاعشاب لشامبو



 2- عرق السوس (وده اسمه الصح) دى عشبه بتشتغل بنفس الطريقه..طبعا مش هقولك اشربيها داخليا لانها شويه مضاعفات الامن ان تستخدم موضعيا كخلاصة فى صورة شامبو او لوشن ..طبعا تحضير خلاصات الاعشاب له طرقه و اسلوبه الصحيح ....فى اوروبا لقيت منتج من خلاصة عرق السوس بيستخدم فى علاج اكزيما الفروة و سقوط الشعر منتج اسبانى و مشهور ...و بدأ الاطباء يستخدموه فى مصر كوصفات صيدلانيه ...الغريب ان سعره غالى جدا ...بس نعمل ايه همه يفكرو احنا ندفع مع اننا عندنا العرق سوس بببلاش ....
3- الشاى الاخضر ...بيحتوى على مواد اسمها الكاتيكينز بتشتغل بنفس الطريقه ..نعمل خلاصة مركزة و نشربها ..(بالاضافه طبعا لفوايده الاخرى) ..ويستحسن نعمله غسول للراس ..زبس تاكدى ان اللى معاكى شاى اخضر ...او نحطة فى صورة شامبو يومى حتى لو بتستخدميه داخليا ...عاوزكم لما تشتروا الشاى الاخضر من اى عطار تعملو تجربة بسيطة ..ارمى ورقة كاملة فى نص كوب ماء و سيبيها عشر دقايق مثلا وبعدين قارنيها بالصورة دى علشان تتاكدى انه شاى اخضر

 
...يبقى تناولى كبسولات البلميت المنشارى و استخدمى الشامبو او اللوشن بتاعه وكمان شامبو عرق السوس ....وكمان لوشن الشاى الاخضر مع شربه ....هتحسى فعلا بفرق كبير جدا ...بالذات مع ما سنذكره من اعشاب