نكمل الحوار اللى بدأناه لان ناس كتيرة كانت معجبة بالموضوع و طلبت انى مكسلشى و اكمل الموضوع بسرعة ...قبل مكمل عاوز اشير لحاجتين ...طبعا ناس كتيرة سالونى الخلاصات دى منين و الكريم ده منين ..فلما قلت لبعضهم ان الخلاصات دى هتلاقوها عندنا فى المكتب زعلو لانى ال بعمل دعاية للمكتب و لمنتجى ..اولا مش عيب انى اعمل دعايه لحاجة انا شربت فيها لمر دراسة و شغل و تزبيط ..الحاجة التانيه انى لو احلتكم على اى عطار يبقى بغشكم من الاخر ..لانى عارف ان مفيش عطار فيكى يا مصر يعرف يعنى ايه خلاصة عشب ..اخر العطار يعرف كلمة زيت عشبى و طبعا برضو ميعرفشى اكتر من اسمه ..و لعلمكم انا صالا مفتحتش المكتب لسه و اللى بيطلب منى حاجة ببعتهاله بصفة شخصية ..لانى عارف ان خلاصاتنا و تركيباتنا معمولة صح ونتو عارفين كل حاجة فيها انا مبخبيش حاجة عن حد والا مكنتش اصلا عملت الجروب دى ...ده شىء حبيت اقوله
---------------------------------------------------------------
نرجع لمرجوعنا ..قلنا امبارح خلاصة اللافندر و الصبار ودول ضمن اقوى حاجة لموضوع حروق الشمس ..مش هنسى كان صديق ليا كان رايح المصيف فطلب منى تركيبة للموضوع ده ..و حصل ان بنته فعلا اتحرقت جامد من الشمس اول يوم فاتصل بيا قلت له استخدم الكريم ..طبعا هوة كان عاوز حاجة قوية و فعاله ولو كنت قلت له على كورتيزون كان استخدمه ..بس انا كنت واثق الحمد لله فى التركيبة ..و طبعا بعد عدة ساعات و فى المساء اتصل بيقول انه فعلا مبسوط جدا وانه مكانشى مصدق ان التركيبة هتكون بالقوة دى...و الحمد لله ...يا جماعه احنا لما بنقول حاجة مش بنقولها فقط لان العلم بيأيدها او انها عليها ابحاث كتيرة ..بل لانها كمان مجربة فى عدد من الحالات ..وده اساس كلامى غالبا ..نقول كمان
*خلاصة الشاى الاخضر ..ودى من الحاجات الفعاله جدا فى الموضوع ده ..فى امريكا و اوروبا معظم العشابين بيقولو ان الشاى الاخضر مش لوحده فعال ..بل كل الاعشاب المحتوية على التانينات ..الاعشاب القابضة يعنى اللى اتكلمنا عليها فى الكورس ...ونا بضيف انه على هذا الكلام فان خلاصة ورق الزيتون فعاله جدا ...بل و افعل من خلاصة الشاى الاخضر ...ونا بنافس دايما و اتحدى الغرب بورق الزيتون فى مقابله الشاى الاخضر ..لان خصائص ورق الزيتون كمضاد للاكسدة و مضاد للجراثيم و قابض و مضاد للكوليسترول و غيره من الخصائص المشتركة ..ورق الزيتون اقوى بكتير عن الشاى الاخضر ..ولكن زى مقالو ..اهله لم يقومو به ..يعنى احنا اصحاب ثقافة الزيتون معرفناش نستخدمه صح .ببساطة ....استخدمى خلاصة ورق الزيتون او الشاى الاخضر لو عاوزة بعد اى حرق ...قطنة مفرودة تتبل خلاصة لحد متتشبع و تتفرد على مكان الحرق و تتساب دقايق و تتشال ..و تتغير ..لحد متحسى بهدوء الانسجة و تلطيفها ...دى طريقه الاستخدام فى الاتنين اللى فاتو كمان . لو ملقيتيش الخلاصة .استخدمى اكياس الشاى الاخضر ..اغلى ميه و حطى فيها الكيس لمدة 10 دقايق ..برديها و حطيها فى التلاجة ...و استمتعى بالاكياس على البشرة او الخلاصة المائية ...طبعا مش هتكون فى قوة الخلاصة بس اهو حاجة تمشى و تسعف و جميله ...اشربى الخلاصة ..و استخدمى الاكياس دة برضو اختيار ..و مفيد برضو فى نفس الحالة
*خلاصة الكالنديولا : الزهرة الذهبية الرائعه جميلة اللون والتاثير ..من اقوى مضادات الالتهاب الموضعيه ..وكريم الكالنديولا فى الخارج من اشهر الكريمات لجميع انواع الالتهابات الجلدية و التسلخات و الحروق الجلدية ...اكتبو بس انتو فى اى محرك بحث كالنديولا كريم ..ونتو تعرفو اد ايه الزهرة ناعمة و قوية وكلها حنيه ....تعرفو الزهرة دى بتتزرع فين ومين اكبر البلاد المصدرة ..؟؟الزهرة دى بتتزرع فى الفيوم فى مصر و مصر بتصدر كميات كبيرة جدا منها ..بس احنا طبعا ...مش هنا ..بكرة هنيجى باذن الله و نبقى فى الصورة.
نكمل بكرة منعا للزعل
شكرا ليكم
د.حكيم زمانه
ليست هناك تعليقات:
إرسال تعليق