موضوعنا النهاردة هوة موضوع الارق ..وده موضوع انتشر بشكل جامد جدا ..حتى انهم عملو مسلسل لا انام ..واصبح شعار لكثير من الشباب..احد اهم اسباب الارق هذه الايام هوة الحوووووووب..لازمه اقوله و اتنهد طبعا ..ويا عجبى على حب الشباب اليوميندولين على راى عضوة زريفه ...الزبون ماشى فى امان الله ..عدت من جنبه فتاه الاحلام لابسه طرحة مزركشة ..وحاطة عطر عفن الليالى ..الزبون اتلوح ..ولف حوالين نفسه ..وتمركز و تحفز..و تقفز...واصيب بنوبه حبيه عاليه الفولت ادت الى صرع قلب البعيد..طبعا روح البيت لا عارف يذاكر و لا يركز..جرى يشترى كتاب فى الحب و اعراضه ..الانتحاب فى اعراض الحب الهباب...باب كيف تعرف انك تحب ..فصل هل تعانى من هذه الاعراض ..قسم انا اسال وانت تجيب ..خن ركز معايا تعرف هوايا..اه فعلا ده كله عندى ...صح مش مركز ..ومقفز...ومتحفز...ومتنرفز..يا ويح قلبى ...وسهر الليالى اشتغل ..و تنح البيه ..و ساب دقنه ..و فلفل شعره ..واخذ يبكى على ليلاه ...وللاسف ليلى لم تبك على احد..نفسى اعرف حبها ازاى و امتى و ليه و ليس و اصبح و امسى و مانربط وما انفك...
قابلت مرة شاب يعانى من ارق و بيصرف دوا ...فبقوله من ايه حالتك دى يا بيه ..قالى حبيت و اديتنى زمبه ..قلت له وايه نوع الزمبه حاكم ده تخصص ليه انواع و اقسام ..قال سابتنى و اتجوزت غيرى..قلت له مهو ده المنطقى ..امال هتفضل سارحه معاك لحد متدفنو سوا على الكورنيش ..هيعملى لى فيها احدب نوتردام البيه ..
اما عن البنات ..فدى عاوزة لها كتاب لوحدها ..البنت لما بتحب بتبقى كارثه على الصعيد الدولى و العالمى ..و البنات اليوميندولين برضو ..بيحبو قبل ميشوفو الحبيب ..وطالما ربنا مبارك لنا فى كليبات الغرام و اغانى الحب المركز..يبقى ياما هنشوف ..كل مركب عربيه مع حد او ميكروباص كله حب فى حب ..حبها و هجرته ..حبته و هجرها ..قتلنى البعيد...رمانى الكئيب...بكانى سنين ..عيطنى الحنين ..سابتنى و خلعت ..وعينها اللى سهرت ...لما بنزل من العربيات مخلص علبتين كلينكس ..وربنا يستر..
اما ارق المتجوزين ....فده فيلم كبير قوى ...البيه سهران و الهانم سهرانه ...و الاتنين عندهم ارق ....جنب بعض و عندهم ارق ....يا محاسن توفيق..قصدى يا محاسن الصدف ..طب كلمها ..يبرطم ابدا...طب كلميه ..تتقمص مش ممكن ...اصل البيه مجابليش الشامبوريال االلى انا طلبته منه وده عكنن عليا ..وطبعا عليه ..عيشتى ...يا انهار ازرق الشامبوريال مرة واحدة لا لا ملوش حق ...يا عم هاتلها الشامبوشلن و ريحها ...لا طبعا يا حكيم ..الهانم اطلب منها تعملى بتنجان بالشاليموز و ترفض ...لا لا لا كده بأة ليك حق ...ليه يا وليه كدة ...ده حتى الشاليموز متوفر ومغرق الدنيا ...وغالبا ..معظم حالات الارق ..لا تستحق الارق ..بل تجيب الارق ..
_______
وفى احد الكتب الرائعه للعشاب الامريكى الهايل كريستوفر هوبس عمل باب سماه .نظافه النوم شويه نصايح شيك جدا لتجنب الارق و النوم....النضيف حبيت اقولهالكم قبل التركيبة
*نظم نومك بمعنى استيقظ ونم فى ساعات ثابته ...حتى لو اختل النظام فى يوم فاستمر عليه حتى لا تصيب الساعة البيولوجية بلخبطة
* نم كمية مناسبة للانشطة اليومية ..بمعنى لا تكثر من النوم فى يوم لا تبذل فيه مجهود و العكس
*مارس رياضة خفيفة قبل النوم بثلاث الى اربع ساعات
*نظم و نظف مكان نومك ..حتى يكون ملائما لنوم نظيف و عميق
* حافظ على درجة حرارة غرفتك معتدله ...الحرارة العاليه تفسد النوم
*لا تكثر من السوائل قبل النوم فلربما تكثر من رحلاتك الى الحمام
*تجنب التدخين او المشروبات المنبهه المحتويه على الكافيين قبل النوم
* انته من مناقشاتك و مشاكلك الاجتماعيه قبل ذهابك للفراش يعنى خلص مشاكلك قبل متروح تنام
*نصيحة رائعه ..لو لقيتك مش عارف تنام قوم و زاول اى نشاط ذهنى ...اقرى ...حل كلمات متقاطعة ..وانصحك تبص فى كتاب دراسى هتنام على طول
* بيقول لو معرفتش تنام بعد ده كله ..مارس رياضة اليوجا او اى رياضه استرخاء ..وانا بقول ..اقرى صفحة من القران بتركيز...او صلى ركعتين ..وصلى على النبى
ليست هناك تعليقات:
إرسال تعليق