خلصنا الطبقة الاولى من البشرة اللى اتمنى فعلا تكونو بتستفيدو من الرغى اللى بقوله ...كدة نشمر و ندخل طوالى الى الطبقة التانية ..اللى بيسميها اهل التخصص ((الديرميس))يبقى عندنا ((ابيدرمس ))و ((ديرميس)) حاجة سهله خالص ...واول ما نشوف من بعيد فى هذه الطبقة هو اشهر و اهم و اجدع ما فيكى يا بشرة ...نشوف حلم الشباب و اكسير الجمال سبحانك يا رب ...نشوف الياف الكولاجين ..وكم فيك اتقال من شعر يا كولا بيه ..على فكرة هوة اسمه مشتف فعلا من كلمة يوناينية اسمها كولا يعنى صمغ ..شوفته ازاى صمغ البشرة و مشد الجلد ..و اللى بيفرق الشاب عن العجوز ...و الصبيه عن ام جعموز..مين ام جعموز دى ؟؟عجيب حكيمو ده و الله ..الكولاجين ده عبارة عن الياف بروتينيه منتشرة فى معظم انحاء جسم الانسان يكفى ان تعلم انه يكون حوالى سبيعن فى المية من جلدك حضرتك..اللى هوة اكبر عضو فى جسم حضرتك برضو..الكولاجين ده بروتين ضام و منضر ..يعنى بيربط خلايا الجلد مع بعضها و يشدها ..مش بس كدة ده كمان بيمتص الرطوبة فينتفخ قليلا فيدى جمال للبشرة ...من المؤسف اننا نفقد واحد ونص فى المية سنويا منه عندما نبلغ 25 سنة ..يعنى كل سنة يقل فتقل مرونة الجلد و ترابطه ..و نبتدى نعانى مما يسمى ارتخاء الجلد و كرمشته او التجاعيد..اللى بتحاول كل شركات التجميل علاجه بكل طريقة ...المفيد جدا انك تعرفى ان مفيش منتج فيه كولاجين موضعى مفيد ...مفاجأة عارف بس دى الحقيقة ..لان اصلا صعب جدا انه يمتص لانه وزنه الجزيئى عالى جدا و لا يمكنه ان يخترق الجلد ...الامر التانى انه مش هيدوب جوة ..يعنى هيه خدعة تسويقية زيها زى كتير من الخدع اللى فى هذا المجال و التى تنتشر نظرا لجهل العامة الغوغاء بأسس((اللعبة))حلوة الحتة دى صح ؟؟ ...يبقى انك تحطى كولاجين من برة ده ملوش اى لازمة لانها بس هيلزق وشك و يشده زى الصمغ من برة ..وهيروح مع اول شطفة ..امال نعمل ايه ...الصح اننا نكثر جدا من المواد اللى بتساهم فى اعادة تكوينه ومنع تحطمه ..ودى المواد اللى بتحتوى على فيتامين سى و هاء و الف ..ودى طبعا الفاكهة كلها و الخضروات و البيض و اللبن و خاصة طبعا العائلة البرتقاليه لان فيتامين سى يدخل بقوة فى تركيب الكولاجين ..ينصح ايضا ببعض المكسرات الخفيفة ..علشان فيتامين هاء ..او تتناولى كبسولات زيت جنين القمح ..وده مصدر رائع لهذا الفيتامين ...قررت يوما ان اجمع هذه الحاجات فى قاعدة كريم ..اللى هيه فيتامين سى و الف و زيت جنين القمح ..لربما يستفيد منه الجلد و البشرة ..و استخدمت معاهم خلاصة الصبار لانها بتحتوى على عدد من الانزيمات المهمة لمنع تكسير و اعادة تكوين الكولاجين ..وعملته بالفعل و طلع فعلا حلو من الناحية التركيبية ..وهو تحت التجريب من عدد كبير من الفتيات اللائى يحلمن ببشرة ..بلا تجاعيد..وان كان ده على اطلاقه كدة ...غير ممكن..بمعنى انه مش ممكن نمنع التجاعيد..بس ممكن نقللها او ناخرها لحد منتمتع ببشرتنا .. لازم نقول كدة .لاننا تعودنا على ان نكون صرحاء و امناء مع بعض وان كنا خارج نطاق ...((اللعبة)) صدعتكم ؟؟
كفاية كدة انهاردة
د.حكيم زمانه
كفاية كدة انهاردة
د.حكيم زمانه
ليست هناك تعليقات:
إرسال تعليق