موسوعة((الطبيعة و جمال بشرتك))-3

كنا اتكلمنا عن اول طبقة من طبقات الجلد ..وعاوزكم تفهمو حاجة مهمة جدا ..ان الربط بين تشريح الجلد و التجميل مش بدعة و لا افتكاسة منى لأ طبعا ..ده فى موسوعات مؤلفة فى كدة ..ومنها على سبيل المثال واللى انصح بيه المتخصصين كتاب ..كوزمتك ديرماتولوجى..لمجموعة من المؤلفين..وده قد انقل منه احيانا بعض المعلومات المترجمة ...مش هطول عليكو..اتكلمنا عن الميلانوسيتس...و ذكرنا الكيراتينوسايتس و عدينا عليها بسرعة و علشان كدة زعلت جدا منى ..ولامتنى لانها مش اقل من التانيه ..و زيها زى التانيه مهمة جدا فى بشرة سيادة جناب حضرتك...وقالت لى يا عم حكيم بقى انا اللى بنتج الكيراتبن متتكلمشى عنى كلمة و اللى بتنتج الميلانين تعملها الهلولة دى ..مكنشى العشم يا عم حكيم .اثرت فيا قوى الجملة دى ..و اعتذر رسميا لكل خليه من طبقة الكيراتينوسايت المنتجة للكيراتين الذى لا يقل ابدا اهمية عن الميلانين ..و ارفع لها القبعة..يكفى انها منتجى لبروتين الكيراتتين اللى هوة البروتين الرئيسى اللى بيمسك خلايا البشرة و يشدها مع بعضها و يديها قوامها الجميل اللى بتبحث عنه كل باحثة عن الجمال فيك يا ارض..هديكو صورة خفيفة تبين لكم اد ايه الكيراتين ده قوى و متشعب و متكون من خيوط فى منتهى القوة بتتوغل و تشد جدران الخلايا و تدعمها
http://hakeemzamano.googlepages.com/762px-Figure1Intro2Keratin.jpg
الكيراتين لو حصله حاجة يا جماعه تختل قوة الخليه ..و تضعف جدرانها ..وده اساسا بيحصل تدريجيا مع السن ده طبيعى ..بس احنا مطالبين اننا نحافظ عليه ..لانه لو تعب بتترهل الخليه و تصحب حساسة جدا لاى مؤثر خارجى ودى بتكون حالة مرضيه ..مش بس بتنتج الكيراتين بل بتنتج احماض بروتينات اخرى وظيفتها ترطيب و تقوية جدران الخليه ومش مهم الاسماء علشان متتعقدوش ..
سؤال جميل جدا ....هل منتجات التجميل التى يكتب عليها انها تحتوى على كيراتين مفيدة ؟؟؟ طبعا كله هيقول طبيعى لانه بيمد البشرة بالكيراتين و يخليها اقوى و اجمد ..بس للأسف مش دايما صح ...لان هذا الكيراتين مستخلص من اجزاء حيوانية غنية بالكيراتين ..ووووااااوووو..كويس ..بس بطريقه الغلى الشديد و تحت ضغط عالى ..وده كفايه جدا لتحطيم كل ما هو كيراتينى فى المستخلص ...يعنى زيرو كيراتين وايه الحل و المفيد..ده فى العدد الجديد ..من السلسلة و القادم باذن الله
اتمنى تكونو استفدتو
د.حكيم زمانه